പൊതുവിദ്യാഭ്യാസ ഡയറക്ടറേറ്റ്, പരീക്ഷാഭവൻ, ഹയർ സെക്കൻഡറി വിഭാഗം എന്നിവയുടെ വിവിധ സേവനങ്ങൾക്ക് കൃത്യമായ സമയപരിധി നിശ്ചയിച്ച് സംസ്ഥാന സർക്കാർ വിജ്ഞാപനമിറക്കി. സർട്ടിഫിക്കറ്റുകൾ അടക്കമുള്ള സേവനങ്ങൾ ഇനി സേവനാവകാശ നിയമത്തിന്റെ പരിധിയിൽ വരും. തുടർപഠനത്തിനും ജോലി ആവശ്യങ്ങൾക്കും ആവശ്യമായ രേഖകൾ വേഗത്തിൽ ലഭ്യമാക്കുന്നതിനാണ് ഈ നടപടി. ഇതിലൂടെ പരീക്ഷാർത്ഥികൾക്ക് പരീക്ഷാഭവനിൽ നിന്നും മറ്റ് ഓഫീസുകളിൽ നിന്നും നിശ്ചിത ദിവസങ്ങൾക്കുള്ളിൽ സേവനങ്ങൾ ഉറപ്പാക്കാനാകും.
സമയപരിധി ഒറ്റനോട്ടത്തിൽ
- പരീക്ഷാഭവൻ സേവനങ്ങൾ:
- പരീക്ഷാർത്ഥികളുടെ മാർക്ക് വിവരങ്ങൾ അപേക്ഷ നൽകി 5 ദിവസത്തിനകം ലഭ്യമാക്കും.
- മറ്റ് സംസ്ഥാനങ്ങളിൽ പഠനം തുടരുന്നതിനുള്ള 10-ാം ക്ലാസ് യോഗ്യതാ സർട്ടിഫിക്കറ്റ് 15 ദിവസത്തിനകവും, മൈഗ്രേഷൻ സർട്ടിഫിക്കറ്റ് 5 ദിവസത്തിനകവും നൽകും.
- സർട്ടിഫിക്കറ്റ് വെരിഫിക്കേഷന് 30 ദിവസവും, തിരുത്തലുകൾക്ക് 60 ദിവസവുമാണ് സമയപരിധി.
- ജനനത്തീയതി തിരുത്തുന്നതിന് 30 ദിവസം.
- നഷ്ടപ്പെട്ട യോഗ്യതാ സർട്ടിഫിക്കറ്റിന്റെ ഡ്യൂപ്ലിക്കേറ്റ്: 2001-ന് മുൻപുള്ളവയ്ക്ക് 60 ദിവസവും, അതിനുശേഷമുള്ളവയ്ക്ക് 30 ദിവസവും.
- പൊതുവിദ്യാഭ്യാസ ഡയറക്ടറേറ്റ്:
- തുല്യതാ സർട്ടിഫിക്കറ്റ് നൽകുന്നതിനും പ്രവേശനം റദ്ദാക്കുന്നതിനും 14 ദിവസം.
- ഹയർ സെക്കൻഡറി വിഭാഗം:
- സർട്ടിഫിക്കറ്റുകളുടെയും മൈഗ്രേഷന്റെയും ഡ്യൂപ്ലിക്കേറ്റ് രേഖകൾക്ക് 21 ദിവസം.
- വൊക്കേഷണൽ ഹയർ സെക്കൻഡറി:
- എലിജിബിലിറ്റി, പാസ് സർട്ടിഫിക്കറ്റുകൾ 14 ദിവസത്തിനുള്ളിൽ വിതരണം ചെയ്യും.
- സ്‌കൂൾതല സേവനങ്ങൾ:
- ടി.സി., പകർപ്പുകൾ, സ്വഭാവ സർട്ടിഫിക്കറ്റ്, പുനഃപ്രവേശനം, മൈഗ്രേഷൻ സർട്ടിഫിക്കറ്റ് എന്നിവ ഒരു ദിവസത്തിനകം ലഭ്യമാക്കണം.
- പരീക്ഷാവിഭാഗത്തിൽ നിന്നുള്ള ഡ്യൂപ്ലിക്കേറ്റ് സർട്ടിഫിക്കറ്റുകൾക്ക് 14 ദിവസവും, സർട്ടിഫിക്കറ്റിലെ തെറ്റുകൾ തിരുത്തുന്നതിന് 7 ദിവസവുമാണ് അനുവദിച്ചിരിക്കുന്നത്.