മെഡിക്കൽ, എഞ്ചിനീയറിങ് തുടങ്ങിയ പ്രൊഫഷണൽ കോഴ്സുകളിൽ പ്രവേശനം നേടിയ ശേഷം പഠനത്തിനിടയിൽ ഫീസ് വർദ്ധിപ്പിക്കുന്നത് അനുവദിക്കാനാവില്ലെന്ന് സുപ്രീം കോടതി വ്യക്തമാക്കി.
പ്രവേശന സമയത്ത് നിശ്ചയിച്ച ഫീസിൽ മാറ്റം വരുത്താൻ പാടില്ല. അപ്രതീക്ഷിതമായി ഉണ്ടാകുന്ന ചെലവുകൾ പോലുള്ള അപൂർവ്വ സാഹചര്യങ്ങളിൽ മാത്രമേ ഫീസ് ഘടനയിൽ മാറ്റം വരുത്താൻ അനുമതിയുള്ളൂവെന്നും കോടതി ചൂണ്ടിക്കാട്ടി. ജസ്റ്റിസുമാരായ പി.എസ്. നരസിംഹ, അലോക് ആരാധെ എന്നിവരുൾപ്പെട്ട ബെഞ്ചാണ് ഈ നിർണ്ണായക ഉത്തരവ് പുറപ്പെടുവിച്ചത്.
സാമ്പത്തിക ബാധ്യതയും നിർദ്ദേശങ്ങളും
പ്രൊഫഷണൽ കോഴ്സുകൾക്ക് 711 ശതമാനം വരെ ഉയർന്ന ഫീസാണ് നിലവിൽ ഈടാക്കുന്നത്. ഭൂരിഭാഗം സാധാരണ കുടുംബങ്ങൾക്കും ഇതൊരു വലിയ സാമ്പത്തിക ബാധ്യതയാണ്. കുട്ടികളുടെ മികച്ച ഭാവിക്കായി പല കുടുംബങ്ങളും വിദ്യാഭ്യാസ വായ്പകളെ ആശ്രയിച്ചാണ് ഇത്രയും ഉയർന്ന തുക കണ്ടെത്തുന്നത്.
പഠനത്തിനിടയിലെ അപ്രതീക്ഷിത ഫീസ് വർധനവ് വിദ്യാർത്ഥികളുടെയും രക്ഷിതാക്കളുടെയും മാനസിക-സാമ്പത്തിക സുരക്ഷിതത്വത്തെ പ്രതികൂലമായി ബാധിക്കുമെന്ന് ചൂണ്ടിക്കാണിക്കപ്പെടുന്നു. അതിനാൽ, ഒരു കോഴ്സിന്റെ മുഴുവൻ കാലയളവിലേക്കുമുള്ള ഫീസ് വിവരം പ്രവേശനത്തിന് മുൻപ് തന്നെ പ്രൊഫഷണൽ സ്ഥാപനങ്ങളും ബന്ധപ്പെട്ട അതോറിറ്റികളും വ്യക്തമായി പ്രസിദ്ധീകരിക്കുകയും കൃത്യത ഉറപ്പാക്കുകയും വേണം.