സംസ്ഥാന സ്കൂൾ കായികമേളയിൽ പങ്കെടുക്കുന്ന വിദ്യാർഥികൾക്കും കായികതാരങ്ങൾക്കും നാവില്‍ കൊതിയൂറുന്ന രുചിപ്പെരുമയൊരുക്കാൻ ഇത്തവണയും പ്രശസ്ത കാറ്ററിങ് വിദഗ്ധൻ പഴയിടം മോഹനൻ നമ്പൂതിരിയെത്തുന്നു. കായികതാരങ്ങളുടെ ഊർജം നിലനിർത്തുന്നതിനായി ചിക്കനും ബീഫും പാലും പഴങ്ങളും മുട്ടയുമടങ്ങിയ സമീകൃതവും പോഷകസമൃദ്ധവുമായ ഭക്ഷണക്രമമാണ് ഇത്തവണ മേളയ്ക്കായി തയ്യാറാക്കിയിരിക്കുന്നത്.
മേളയുടെ സുഗമമായ നടത്തിപ്പിനായി രണ്ട് വ്യത്യസ്ത അടുക്കളകളാണ് സംഘാടകർ സജ്ജീകരിച്ചിരിക്കുന്നത്. വിദ്യാർഥികൾക്ക് മത്സരവേദികളിൽനിന്ന് ദൂരെയുള്ള ഭക്ഷണശാലകളിലേക്ക് യാത്ര ചെയ്യേണ്ടിവരുന്ന ബുദ്ധിമുട്ടുകൾ ഒഴിവാക്കാൻ അതത് വേദികളിൽ നേരിട്ട് ഭക്ഷണം എത്തിക്കാനും പ്രത്യേക സൗകര്യങ്ങളൊരുക്കിയിട്ടുണ്ട്. ആകെ പത്ത് വേദികളിലായി നടക്കുന്ന മത്സരങ്ങളിൽ, പ്രധാന പാചകശാലകൾ പ്രവർത്തിക്കുന്ന എൻ.ഐ.ടി., കൊടിയത്തൂർ പിടിഎം എച്ച്.എസ്.എസ്. എന്നീ രണ്ട് കേന്ദ്രങ്ങൾ ഒഴികെയുള്ള എട്ട് വേദികളിലേക്കും എൻ.ഐ.ടി. അടുക്കളയിൽ നിന്ന് കൃത്യസമയത്ത് ഭക്ഷണം എത്തിക്കുന്നതിനായി പ്രത്യേക വാഹനങ്ങളും സജ്ജമാക്കിയിട്ടുണ്ട്.
ചാത്തമംഗലം പന്ത്രണ്ടിലെ എൻ.ഐ.ടി. പുതിയ സ്പോർട്സ് അരീനയിലാണ് പ്രധാന കലവറയും പാചകപ്പുരയുമടങ്ങുന്ന കൂറ്റൻ പാചകശാല ഒരുങ്ങിയിരിക്കുന്നത്. ഇതിന് ഏകദേശം 12,000 ചതുരശ്ര അടി വിസ്തൃതിയുമുണ്ട്. ഇവിടത്തെ പ്രധാന അടുക്കളയുടെ തട്ടടിക്കുന്ന ജോലികൾ ഉൾപ്പെടെയുള്ള അവസാനഘട്ട നിർമാണ പ്രവർത്തനങ്ങൾ ഇതിനോടകം പുരോഗമിക്കുകയാണ്. കൊടിയത്തൂർ പിടിഎം എച്ച്.എസ്.എസ്സിലാണ് രണ്ടാമത്തെ പാചകശാല പ്രവർത്തിക്കുന്നത്.
പ്രഭാതഭക്ഷണം, ഉച്ചഭക്ഷണം, അത്താഴം എന്നിവയ്ക്ക് പുറമേ, മത്സരവേദികളിലെത്തുന്ന കായികതാരങ്ങൾക്ക് രാവിലെ ഭക്ഷണത്തിനൊപ്പം പാലും മുട്ടയും രാത്രി ഭക്ഷണത്തോടൊപ്പം കട്ട് ഫ്രൂട്സും നൽകി വരുന്നുണ്ട്. കൂടാതെ, ഇടവേളകളിൽ റഫറിമാർക്കും സംഘാടകർക്കും ഉൾപ്പെടെയുള്ളവർക്കായി ചായയും പലഹാരങ്ങളും വിതരണം ചെയ്യും. പ്രധാന ഭക്ഷണശാലകളിൽ ഒരുനേരം ശരാശരി 15,000 പേർക്ക് ഭക്ഷണം കഴിക്കാനുള്ള വിപുലമായ സൗകര്യങ്ങളാണ് ഒരുക്കിയിരിക്കുന്നത്. പി.കെ. അരവിന്ദൻ അധ്യക്ഷനായുള്ള ഭക്ഷണ കമ്മിറ്റിയുടെ നേരിട്ടുള്ള നേതൃത്വത്തിലാണ് മേളയ്ക്കുള്ള ഒരുമിച്ചുള്ള പ്രവർത്തനങ്ങൾ പുരോഗമിക്കുന്നത്.