വിദ്യാർത്ഥികൾക്കായി പഠനവും വിനോദവും ഒരുമിച്ചുനൽകുന്ന പുതിയ പദ്ധതിയുമായി കെഎസ്ആർടിസി രംഗത്ത്. സ്ത്രീ സൗഹൃദ യാത്രാ പദ്ധതിയായ ‘പ്രിയദർശിനിയുടെ’ വിജയത്തിന് പിന്നാലെയാണ് വിദ്യാർത്ഥികൾക്കായി കുറഞ്ഞ ചെലവിൽ പ്രത്യേക വിനോദയാത്രാ പാക്കേജായ ‘വിജ്ഞാന ദർശിനി’ ആരംഭിക്കുന്നത്. ഗതാഗത വകുപ്പ് മന്ത്രിയുടെ പ്രത്യേക നിർദ്ദേശപ്രകാരമാണ് കെഎസ്ആർടിസി ബജറ്റ് ടൂറിസം സെൽ ഈ മാതൃകാപരമായ പദ്ധതിക്ക് രൂപം നൽകിയിരിക്കുന്നത്.
പുസ്തകത്താളുകളിൽ ഒതുങ്ങുന്ന അറിവുകൾ നേരിട്ട് കണ്ടു മനസ്സിലാക്കാൻ വിദ്യാർത്ഥികൾക്ക് അവസരമൊരുക്കുകയാണ് പദ്ധതിയുടെ പ്രധാന ലക്ഷ്യം. സാംസ്കാരിക സ്ഥാപനങ്ങൾ, ചരിത്രപ്രധാനമായ പുരാവസ്തു കേന്ദ്രങ്ങൾ, ഫാക്ടറികൾ, പ്രധാന വിനോദസഞ്ചാര കേന്ദ്രങ്ങൾ എന്നിവയെല്ലാം ഈ യാത്രാ പദ്ധതിയിൽ ഉൾപ്പെടുത്തിയിട്ടുണ്ട്. വിദ്യാഭ്യാസവും വിനോദവും ഒരുമിപ്പിക്കുന്ന ഈ യാത്രകളിലൂടെ വിദ്യാർഥികൾക്ക് പഠനത്തിന്റെ ഭാഗമായി പുതിയ അനുഭവങ്ങളും അറിവുകളും നേടാൻ അവസരമൊരുങ്ങും.
യാത്രാ സൗകര്യങ്ങളും ഇൻഡസ്ട്രിയൽ വിസിറ്റും
ബജറ്റ് ടൂറിസം സെല്ലിന്റെ പ്രത്യേക ബസുകളിൽ ഒരേസമയം 36 വിദ്യാർഥികൾക്ക് ഈ യാത്രകളിൽ പങ്കെടുക്കാം. വിദ്യാഭ്യാസ സ്ഥാപനങ്ങളുടെ ആവശ്യങ്ങൾക്കും സൗകര്യങ്ങൾക്കും അനുസരിച്ച് യാത്രകൾ ക്രമീകരിക്കുമെന്നത് ഇതിന്റെ പ്രധാന പ്രത്യേകതയാണ്. അതത് സ്ഥാപനങ്ങളുടെ ആവശ്യപ്രകാരം വ്യവസായ സ്ഥാപനങ്ങൾ സന്ദർശിക്കുന്ന ഇൻഡസ്ട്രിയൽ വിസിറ്റ് ഉൾപ്പെടെയുള്ള യാത്രകളും ഇതിലൂടെ ഒരുക്കും.
ആദ്യഘട്ടം തിരുവനന്തപുരത്ത്
പദ്ധതിയുടെ ആദ്യഘട്ടമെന്ന നിലയിൽ തിരുവനന്തപുരം ജില്ലയിലെ പ്രമുഖ കേന്ദ്രങ്ങളിലേക്കാണ് ഇപ്പോൾ സർവീസുകൾ ക്രമീകരിച്ചിരിക്കുന്നത്. പ്രകൃതി സൗന്ദര്യം തുളുമ്പുന്ന പൊന്മുടി മലനിരകൾക്കൊപ്പം താഴെ പറയുന്ന പ്രധാന കേന്ദ്രങ്ങളും വിദ്യാർത്ഥികൾക്ക് സന്ദർശിക്കാവുന്നതാണ്:
- കാപ്പുകാട് ആനവളർത്തൽ കേന്ദ്രം
- നെയ്യാർ ഡാം
- പാലോട് ബൊട്ടാണിക്കൽ ഗാർഡൻ
- വിതുര ജേഴ്സി ഫാം
- മ്യൂസിയം, പ്ലാനറ്റേറിയം
തിരുവനന്തപുരത്തെ വിജയത്തിന് ശേഷം ഈ പദ്ധതി കേരളത്തിലെ മറ്റ് ജില്ലകളിലേക്കും വ്യാപിപ്പിക്കാനുള്ള ഒരുക്കത്തിലാണ് കെഎസ്ആർടിസി അധികൃതർ. വളരെ കുറഞ്ഞ ചെലവിൽ സുരക്ഷിതമായി യാത്ര ചെയ്യാനും ഒപ്പം വിജ്ഞാനം നേടാനും കഴിയുന്ന ഈ പദ്ധതി വിദ്യാർത്ഥികൾക്കും രക്ഷിതാക്കൾക്കും ഒരുപോലെ ആശ്വാസമാകും.
ബന്ധപ്പെടേണ്ട നമ്പറുകൾ
പാക്കേജുകളെക്കുറിച്ചുള്ള കൂടുതൽ വിവരങ്ങൾക്കും യാത്രകൾ ആസൂത്രണം ചെയ്യുന്നതിനും അതത് ജില്ലകളിലെ കെ.എസ്.ആർ.ടി.സി ബജറ്റ് ടൂറിസം സെൽ കോഓഡിനേറ്റർമാരെ ബന്ധപ്പെടാവുന്നതാണ്:
- തിരുവനന്തപുരം നോർത്ത്: 9188619378
- തിരുവനന്തപുരം സൗത്ത്: 9188938522
- കൊല്ലം: 9188938523
- പത്തനംതിട്ട: 9188938524
- ആലപ്പുഴ: 9188938525
- കോട്ടയം: 9188938526
- ഇടുക്കി: 9188938527
- എറണാകുളം: 9188938528
- തൃശൂർ: 9188938529
- പാലക്കാട്: 9188938530
- മലപ്പുറം: 9188938531
- കോഴിക്കോട്: 9188938532
- വയനാട്: 9188938533
- കണ്ണൂർ, കാസർകോട്: 9188938534