12 വർഷത്തെ നീണ്ട ഇടവേളയ്ക്ക് ശേഷം തമിഴ് സിനിമയിലേക്ക് മടങ്ങിയെത്തുന്നതിന്റെ സന്തോഷം പങ്കുവെച്ച് നടി നസ്രിയ നസീം. ജിത്തു മാധവൻ സംവിധാനം ചെയ്യുന്ന പുതിയ ചിത്രമായ ‘സീൻ’ (SCENE) സിനിമയുടെ പ്രചാരണാർത്ഥം ദുബായിൽ സംഘടിപ്പിച്ച ചടങ്ങിലാണ് താരം തന്റെ മനസ്സ് തുറന്നത്. സൂര്യയും നസ്ലിനും കേന്ദ്രകഥാപാത്രങ്ങളെ അവതരിപ്പിക്കുന്ന ചിത്രത്തിലൂടെയാണ് നസ്രിയയുടെ ഈ തിരിച്ചുവരവ്.
തന്റെ ബാല്യകാലവും വിദ്യാഭ്യാസവും ചെന്നൈയിലായിരുന്നതിനാൽ, തമിഴ് സിനിമയിലേക്കുള്ള ഈ മടങ്ങിവരവ് സ്വന്തം വീട്ടിലേക്ക് തിരിച്ചെത്തുന്നത് പോലെയുള്ള അനുഭവമാണ് സമ്മാനിക്കുന്നതെന്ന് നസ്രിയ പറഞ്ഞു. തമിഴ് പ്രേക്ഷകർ എന്നും നൽകിയിട്ടുള്ള സ്നേഹത്തിനും പിന്തുണയ്ക്കും നന്ദി പറഞ്ഞ താരം, പുതിയ ചിത്രത്തിലും മികച്ചൊരു കഥാപാത്രത്തെയാണ് അവതരിപ്പിക്കുന്നതെന്ന് വ്യക്തമാക്കി.
’ആവേശം’ എന്ന വൻ വിജയചിത്രത്തിന് ശേഷം ജിത്തു മാധവൻ സംവിധാനം ചെയ്യുന്ന ‘സീൻ’ വലിയ പ്രതീക്ഷയോടെയാണ് ആരാധകർ കാത്തിരിക്കുന്നത്. സൂര്യയും നസ്ലിനും ആദ്യമായി ഒന്നിക്കുന്നു എന്ന പ്രത്യേകതയും ഈ ചിത്രത്തിനുണ്ട്. ചിത്രത്തിന്റെ ദുബായിൽ നടന്ന പ്രമോഷൻ ഈവന്റിൽ അണിയറപ്രവർത്തകരും മറ്റ് താരങ്ങളും പങ്കെടുത്തു.