ഡിസംബറിൽ നടക്കാനിരിക്കുന്ന യു.ജി.സി നെറ്റ് (UGC NET) പരീക്ഷയ്ക്കുള്ള ഓൺലൈൻ രജിസ്ട്രേഷൻ അവസാന തീയതി നീട്ടി നൽകി നാഷണൽ ടെസ്റ്റിംഗ് ഏജൻസി (എൻ.ടി.എ). ഇതുവരെ അപേക്ഷ സമർപ്പിക്കാൻ സാധിക്കാത്ത ഉദ്യോഗാർത്ഥികൾക്ക് ഇനി വരുന്ന ഒക്ടോബർ 31 വരെ പിഴയൊന്നും കൂടാതെ അപേക്ഷകൾ അയക്കാവുന്നതാണ്.
പരീക്ഷാ ഫീസ് അടയ്ക്കാനുള്ള സമയപരിധിയും അന്ന് രാത്രി 11:50 വരെ നീട്ടി നൽകിയിട്ടുണ്ട്. കൂടുതൽ ഉദ്യോഗാർത്ഥികൾക്ക് അവസരം ലഭ്യമാക്കുന്നതിന്റെ ഭാഗമായാണ് ഈ നടപടിയെന്ന് എൻ.ടി.എ വ്യക്തമാക്കിയിട്ടുണ്ട്. അവസാന നിമിഷങ്ങളിലെ തിരക്ക് കാരണം ഉണ്ടാകാനിടയുള്ള തടസ്സങ്ങൾ ഒഴിവാക്കാൻ, താൽപ്പര്യമുള്ളവർ എത്രയും വേഗം അപേക്ഷ നടപടികൾ പൂർത്തിയാക്കണമെന്ന് അധികൃതർ മുന്നറിയിപ്പ് നൽകുന്നു.
രാജ്യത്തെ വിവിധ സർവ്വകലാശാലകളിൽ അസിസ്റ്റന്റ് പ്രൊഫസർ നിയമനം, ജൂനിയർ റിസർച്ച് ഫെലോഷ്പ് (JRF), കൂടാതെ പിഎച്ച്ഡി പ്രവേശനം എന്നിവയ്ക്കുള്ള അർഹത പരിശോധിക്കുന്ന നിർണ്ണായക പരീക്ഷയാണ് യു.ജി.സി നെറ്റ്. ഈ പരീക്ഷയുമായി ബന്ധപ്പെട്ട കൂടുതൽ വിവരങ്ങൾ അറിയാനും സംശയങ്ങൾ ദൂരീകരിക്കാനും ഔദ്യോഗിക വെബ്‌സൈറ്റായ (http://ugcnet.nta.nic.in) സന്ദർശിക്കാവുന്നതാണ്.
