സംസ്ഥാന സർക്കാർ ജീവനക്കാരുടെ പൊതു സ്ഥലംമാറ്റത്തിനുള്ള മിനിമം സേവനദൈർഘ്യ മാനദണ്ഡങ്ങൾ പ്രകാരം, മലയോര/റിമോട്ട് പ്രദേശങ്ങളിൽ ജോലി നോക്കിയിട്ടുള്ളവരുടെ സേവനകാലം കണക്കാക്കുന്നതിൽ പുതിയ ഭേദഗതികൾ വരുത്തി സർക്കാർ ഉത്തരവ് പുറത്തിറക്കി. ഒരേ സ്ഥലത്തേക്ക് നിരവധി അപേക്ഷകർ സ്ഥലംമാറ്റം ആവശ്യപ്പെട്ട് എത്തുന്ന സാഹചര്യത്തിലാണ് ഈ നിർദ്ദേശങ്ങൾ.
പ്രധാന വിവരങ്ങൾ:
- സേവനകാല ഇളവ്: വയനാട് ജില്ലയിലെ കൽപറ്റ, സുൽത്താൻ ബത്തേരി എന്നീ സ്ഥലങ്ങളിലെ 8 കിലോമീറ്റർ ചുറ്റളവിലുള്ള പ്രദേശങ്ങൾ ഉൾപ്പെടെ റവന്യൂ വകുപ്പ് മലയോര/വിദൂര പ്രദേശങ്ങളായി നിർവചിച്ചിട്ടുള്ള സ്ഥലങ്ങളിലെ സ്‌കൂളുകളെയും മലയോര/വിദൂര മേഖലയായി പരിഗണിക്കും.
- ആനുകൂല്യം: ഈ സ്‌കൂളുകളിലെ 2 വർഷത്തെ സേവനകാലം സ്ഥലംമാറ്റത്തിന് പരിഗണിക്കുമ്പോൾ 3 വർഷത്തെ സേവനകാലമായി കണക്കാക്കുന്നതാണ്.
- വ്യക്തത വരുത്തൽ: ‘ട്രൈബൽ’, ‘റിമോട്ട് ഏരിയ’, ‘ദുർഘടം പിടിച്ച ജോലി’ എന്നീ പദങ്ങൾ അതത് വകുപ്പുകൾ പ്രത്യേകമായി നിർവചിച്ചു ഉത്തരവാകണമെന്ന് വ്യവസ്ഥ ചെയ്യുന്നു.
- പട്ടിക പുതുക്കൽ: നിലവിലുള്ള ട്രൈബൽ/റിമോട്ട് ഏരിയ/ദുർഘടം പിടിച്ച സ്ഥലം എന്നിവിടങ്ങളിലെ സ്കൂളുകളുടെ ലിസ്റ്റ് കാലാനുസൃതമായി പരിഷ്കരിക്കണമെന്ന് സർക്കാർ വിശദമായി പരിശോധിച്ചു. ഇതിന്റെ അടിസ്ഥാനത്തിലാണ് മലയോര/റിമോട്ട് ഏരിയ/ദുർഘടം പിടിച്ച സ്ഥലം എന്നിവിടങ്ങളിലെ സ്കൂളുകളുടെ പുതുക്കിയ പട്ടിക ഉൾപ്പെടുത്തി മുൻ ഉത്തരവ് പരിഷ്കരിച്ച് ഇപ്പോൾ പുതിയ ഉത്തരവ് പുറത്തിറക്കിയിരിക്കുന്നത്.
ജോയിന്റ് സെക്രട്ടറി ജയകുമാർ സി.എസിന്റെ ഉത്തരവിലാണ് ഈ ഭേദഗതികൾ ഉൾപ്പെടുത്തിയിട്ടുള്ളത്.
