നാഷണൽ ടെസ്റ്റിങ് ഏജൻസി (NTA) നടത്തുന്ന നീറ്റ് (NEET-UG), ജെ.ഇ.ഇ (JEE Main), സി.യു.ഇ.റ്റി (CUET), യു.ജി.സി-നെറ്റ് (UGC-NET) തുടങ്ങിയ പ്രമുഖ ദേശീയതല മത്സരപരീക്ഷകളുടെ സുതാര്യവും പരാതിരഹിതവുമായ നടത്തിപ്പ് ഉറപ്പാക്കുന്നതിനായി ഒബ്‌സർവർമാരെ (സ്വതന്ത്ര നിരീക്ഷകർ) എംപാനൽ ചെയ്യുന്നു. പരീക്ഷാ കേന്ദ്രങ്ങളിൽ മുൻകൂട്ടി നിരീക്ഷണ ചുമതല നൽകുന്നതിനായി സുസജ്ജമായ പ്രതിനിധി പാനൽ തയാറാക്കുകയാണ് ഏജൻസിയുടെ ലക്ഷ്യം.

ആർക്കൊക്കെ അപേക്ഷിക്കാം?

മൂന്ന് പ്രധാന വിഭാഗങ്ങളിലായാണ് അപേക്ഷകൾ ക്ഷണിച്ചിരിക്കുന്നത്:

  1. അധ്യാപകരും പ്രൊഫസർമാരും: സർക്കാർ വിദ്യാലയങ്ങൾ, പോളിടെക്നിക്കുകൾ, ഡയറ്റ് (DIET), കോളേജുകൾ, സർവകലാശാലകൾ എന്നിവയിൽ സേവനമനുഷ്ഠിക്കുന്നവരോ അല്ലെങ്കിൽ വിരമിച്ചവരോ ആയ അധ്യാപകർ/പ്രൊഫസർമാർക്ക് അപേക്ഷിക്കാം. വിരമിച്ചവരുടെ പ്രായപരിധി 60-65 വയസ്സാണ്. സർവീസിലുള്ള അധ്യാപകർക്ക് മേലധികാരിയുടെ നോ ഒബ്ജക്ഷൻ സർട്ടിഫിക്കറ്റ് (NOC) നിർബന്ധമാണ്.
  2. സർക്കാർ ഉദ്യോഗസ്ഥർ: കേന്ദ്ര-സംസ്ഥാന സർവീസുകളിൽ നിന്ന് 7-ാം ശമ്പള കമ്മീഷൻ പേ ലെവൽ 8-നോ അതിനു മുകളിലോ (Pay Level 8+) ഉള്ള തസ്തികകളിൽ നിന്ന് വിരമിച്ച ഉദ്യോഗസ്ഥർ (പ്രായപരിധി 60-65 വയസ്സ്).
  3. വിരമിച്ച സൈനിക/സി.എ.പി.എഫ് ഉദ്യോഗസ്ഥർ: സായുധ സേനകളിൽ നിന്നോ കേന്ദ്ര സായുധ പോലീസ് സേനകളിൽ (CAPF) നിന്നോ വിരമിച്ചവർക്കും (സുബേദാർ മേജർ പദവിക്ക് മുകളിലുള്ളവർ) അപേക്ഷ നൽകാം.

പ്രധാന നിബന്ധനകൾ:

  • അപേക്ഷകർ മികച്ച കായികക്ഷമത ഉള്ളവരും ആവശ്യാനുസരണം യാത്ര ചെയ്യാൻ സന്നദ്ധരുമായിരിക്കണം.
  • നിലവിൽ അച്ചടക്ക നടപടികളോ വിജിലൻസ് കേസുകളോ അഭിമുഖീകരിക്കുന്നവരാകരുത്.
  • വിരമിച്ച ഉദ്യോഗസ്ഥർ ഒരു വർഷത്തിനുള്ളിൽ ലഭിച്ച പോലീസ് വെരിഫിക്കേഷൻ സർട്ടിഫിക്കറ്റോ ക്യാരക്ടർ സർട്ടിഫിക്കറ്റോ ഹാജരാക്കേണ്ടതുണ്ട്.

നിരീക്ഷകരുടെ ചുമതലകളും റോൾ/വേതനവും

പരീക്ഷാ ദിവസം കേന്ദ്രങ്ങളിലെ ബയോമെട്രിക് ഐഡന്റിറ്റി പരിശോധന, ഫ്രിസ്കിങ് (പരിശോധനകൾ), ചോദ്യപേപ്പർ വിതരണം, സി.സി.ടി.വി/വെബ്‌കാസ്റ്റിങ് സംവിധാനങ്ങൾ, വൈദ്യുതി ബാക്കപ്പ് തുടങ്ങിയവ നിരീക്ഷിക്കുകയാണ് പ്രധാന ചുമതല. എന്തെങ്കിലും ക്രമക്കേടുകൾ ശ്രദ്ധയിൽപ്പെട്ടാൽ നേരിട്ട് എൻ.ടി.എ-ക്ക് റിപ്പോർട്ട് ചെയ്യണം.

ബ്രീഫിങ് ദിവസവും പരീക്ഷാ ദിവസവും ഉൾപ്പെടെ പ്രതിദിനം നിശ്ചിത സിറ്റിംഗ് ഫീസും കൺവെയൻസ് അലവൻസും (Briefing day-ക്ക് ₹3,000, Exam day-ക്ക് ₹4,000 വരെ) ലഭിക്കും. പുറംജില്ലകളിൽ ഡ്യൂട്ടി ലഭിക്കുന്നവർക്ക് യാത്രാ/താമസ ചെലവുകൾ പ്രത്യേകമായി അനുവദിക്കും.

അപേക്ഷിക്കേണ്ട വിധം:

താല്പര്യമുള്ള യോഗ്യരായ വ്യക്തികൾക്ക് എൻ.ടി.എ പുറപ്പെടുവിച്ച വിജ്ഞാപനത്തിലെ QR കോഡ് സ്കാൻ ചെയ്തോ http://observermanagement.nta.gov.in എന്ന ഔദ്യോഗിക എൻ.ടി.എ ഒബ്‌സർവർ മാനേജ്‌മെന്റ് പോർട്ടൽ സന്ദർശിച്ചോ അപേക്ഷിക്കാം.

  • അവസാന തീയതി: 2026 ഡിസംബർ 6
  • വിശദവിവരങ്ങൾക്ക്: http://nta.ac.in