കേരളത്തിലെ ഉന്നത വിദ്യാഭ്യാസ മേഖലയെ കൂടുതൽ കാലികവും തൊഴിലധിഷ്ഠിതവുമാക്കാൻ ലക്ഷ്യമിട്ട് നിർണായക നീക്കവുമായി സർക്കാർ. സ്വയംഭരണ കോളേജുകൾക്ക് പുറമെ സർക്കാർ കോളേജുകളിലും പുതിയ കോഴ്സ് കോമ്പിനേഷനുകൾ ആരംഭിക്കാൻ ആലോചന നടക്കുന്നു. സർക്കാരിൻ്റെ പ്രത്യേക അനുമതിയില്ലാതെ തന്നെ സർവ്വകലാശാലാ അനുമതിയോടെ പുതിയ സ്വാശ്രയ കോഴ്സുകൾ തുടങ്ങാമെന്ന ആശയത്തിനാണ് ഇപ്പോൾ മുൻഗണന ലഭിക്കുന്നത്. ഉന്നത വിദ്യാഭ്യാസ കൗൺസിൽ ഭരണസമിതി പുനഃസംഘടിപ്പിച്ച ശേഷമായിരിക്കും ഈ പദ്ധതിയുടെ തുടർ നടപടികൾ നടപ്പിലാക്കുക.
നാല് വർഷ ഡിഗ്രി പ്രോഗ്രാമുകളുടെ ഭാഗമായി പരമ്പരാഗത വിഷയങ്ങൾക്കൊപ്പം തൊഴിൽ സാധ്യതയേറിയ കോഴ്സുകൾ കൂടി ഉൾപ്പെടുത്തി വിദ്യാർത്ഥികളെ ആകർഷിക്കാനാണ് സർക്കാർ ലക്ഷ്യമിടുന്നത്. നിലവിലെ കേരള സർവ്വകലാശാലയിലെ കോളേജുകൾ ഉൾപ്പെടെയുള്ള സ്ഥാപനങ്ങളിൽ പല ഡിഗ്രി പ്രോഗ്രാമുകളും കാലഹരണപ്പെട്ട രീതിയിലാണ് മുന്നോട്ട് പോകുന്നതെന്ന് വിലയിരുത്തപ്പെടുന്നു. എറണാകുളം മഹാരാജാസ് കോളേജ് ഒഴികെയുള്ള എയ്ഡഡ് കോളേജുകളിൽ സർവ്വകലാശാലയുടെ മാത്രം അനുമതിയോടെ പുതിയ കോഴ്സുകൾ തുടങ്ങാനാകും. എന്നാൽ, പരമ്പരാഗത രീതിയിൽ ക്ലാസുകൾ നടത്തുന്ന സർക്കാർ കോളേജുകൾ ഇതിൽ പിന്നിലായിപ്പോകുമോ എന്ന ആശങ്കയും ഉയരുന്നുണ്ട്.
പുതിയ കോഴ്സുകൾ വരുമ്പോൾ അധ്യാപകരുടെ നിയമനം സംബന്ധിച്ചും ചില തടസ്സങ്ങളുണ്ട്. നിലവിലുള്ള കോഴ്സുകളുടെ ഘടന മാറ്റി തൊഴിൽ സാധ്യത വർദ്ധിപ്പിക്കുന്ന വിഷയങ്ങൾ ഉൾപ്പെടുത്തുമ്പോൾ, നിലവിലുള്ള അധ്യാപകർക്ക് ആവശ്യമായ പ്രത്യേക പരിശീലനം നൽകുമെന്ന് ഉന്നത വിദ്യാഭ്യാസ കൗൺസിൽ വൈസ് ചെയർമാൻ ഡോ. അച്യുത് ശങ്കർ എസ്. നായർ വ്യക്തമാക്കിയിട്ടുണ്ട്. ഡിഗ്രി പ്രോഗ്രാമുകളിൽ മേജർ കോഴ്സുകൾക്കൊപ്പം മൈനർ കോഴ്സുകളായി താൽപ്പര്യമുള്ള വിഷയങ്ങൾ തിരഞ്ഞെടുക്കാനുള്ള സ്വാതന്ത്ര്യവും ഇതിലൂടെ ലഭിക്കും.







