അണ്ടർ 19 ഏഷ്യ കപ്പ് കിരീടവിജയത്തിന്റെ ആവേശത്തിൽ നിൽക്കുന്ന ഇന്ത്യൻ ആരാധകർക്ക് ഇരട്ടി മധുരം നൽകാൻ സീനിയർ ടീം ഇന്ന് ഇറങ്ങും. ഇന്ത്യ – ന്യൂസിലൻഡ് അഞ്ച് മത്സരങ്ങളുടെ ഏകദിന പരമ്പരയിലെ അവസാന പോരാട്ടം ഇന്ന് രാവിലെ 7.30 മുതൽ മൗണ്ട് മൗംഗനുയിയിൽ നടക്കും. ഇന്നത്തെ മത്സരത്തിൽ വിജയിച്ചാൽ ഇന്ത്യക്ക് പരമ്പര സ്വന്തമാക്കാം. കഴിഞ്ഞ മത്സരത്തിൽ 89 റൺസിന് പുറത്തായി 244 റൺസിന്റെ വലിയ തോൽവി ഏറ്റുവാങ്ങിയ ഇന്ത്യ, ഇന്നത്തെ മത്സരത്തിൽ ജയിച്ച് 5 മത്സരങ്ങളുടെ പരമ്പര 3-1 ന് സ്വന്തമാക്കാനാണ് ലക്ഷ്യമിടുന്നത്. കഴിഞ്ഞ 7 വർഷമായി ഏകദിന പരമ്പര തോറ്റിട്ടില്ലെന്ന റെക്കോർഡ് കാത്തുസൂക്ഷിക്കാനാണ് കിവീസ് ഇറങ്ങുന്നത്. 2019-ലാണ് ഇന്ത്യയോട് കീവീസ് അവസാനമായി സ്വന്തം മണ്ണിൽ പരമ്പര തോറ്റത്.
കഴിഞ്ഞ മത്സരത്തിൽ മാറ്റ് ഹെൻറിയുടെ പന്തുകൾക്ക് മുന്നിൽ ഇന്ത്യൻ ബാറ്റിംഗ് നിര തകർന്നടിഞ്ഞിരുന്നു. രോഹിത് ശർമ്മ, വിരാട് കോലി, ക്യാപ്റ്റൻ ശ്രേയസ് അയ്യർ എന്നിവർ പൂജ്യത്തിന് പുറത്തായത് തിരിച്ചടിയായി. എങ്കിലും 2027 ഏകദിന ലോകകപ്പിന് തയ്യാറെടുക്കുന്ന ഇന്ത്യൻ ടീമിന് ഇത്തരം സാഹചര്യങ്ങളെ മറികടക്കാൻ പഠിക്കേണ്ടതുണ്ട്. ലോകകപ്പ് നടക്കുന്ന ദക്ഷിണാഫ്രിക്കയിൽ പേസ് അനുകൂല സാഹചര്യങ്ങളായതിനാൽ ഈ മത്സരം നിർണായകമാണ്.
മറുവശത്ത്, ആത്മവിശ്വാസത്തിന്റെ കൊടുംമുടിയിലാണ് ന്യൂസിലൻഡ്. മാറ്റ് ഹെൻറിക്കൊപ്പം മാറ്റ് ഫിഷറും മികച്ച രീതിയിൽ പന്തെറിയുന്നു. ബാറ്റിംഗിൽ വില്യംസണും ടി. സെയിേഫർട്ടും ഫിൻ അലനും മികച്ച ഫോമിലുള്ളത് ഇന്ത്യക്ക് വെല്ലുവിളിയാകും. ബാറ്റിംഗിലും ബൗളിംഗിലും ഒരുപോലെ കരുത്തരായ ന്യൂസിലൻഡിനെതിരെ വിജയം നേടി പരമ്പര പിടിക്കാൻ ഇന്ത്യക്ക് മികച്ച പ്രകടനം പുറത്തെടുക്കേണ്ടി വരും.







