രാജ്യത്തെ കേന്ദ്ര സർക്കാർ ജീവനക്കാർക്കും പെൻഷൻകാർക്കും വലിയ ആശ്വാസം നൽകിക്കൊണ്ട് ക്ഷേമബത്തയിൽ (ഡിഎ., ഡിആർ) മൂന്ന് ശതമാനത്തിന്റെ വർധനവ് വരുത്തിയതായി കേന്ദ്രമന്ത്രി അശ്വിനി വൈഷ്ണവ് ഔദ്യോഗികമായി അറിയിച്ചു. പ്രധാനമന്ത്രി നരേന്ദ്ര മോദിയുടെ അധ്യക്ഷതയിൽ ചേർന്ന ഉന്നതതല മന്ത്രിസഭാ യോഗത്തിലാണ് ഈ നിർണായക തീരുമാനമെടുത്തത്. പുതുക്കിയ ഈ നിരക്കുകൾക്ക് ഈ വർഷം ജൂലൈ ഒന്ന് മുതൽ മുൻകാല പ്രാബല്യമുണ്ടായിരിക്കും.
വർധിച്ചുവരുന്ന വിലക്കയറ്റത്തിന്റെ ആഘാതം ലഘൂകരിക്കുന്നതിനുള്ള പ്രതിരോധ നടപടിയായാണ് സർക്കാർ ഈ ആനുകൂല്യം അനുവദിച്ചിരിക്കുന്നത്. സാധാരണയായി വർഷത്തിൽ രണ്ടു തവണയാണ് കേന്ദ്ര സർക്കാർ ഡി.എയും ഡി.ആറും പരിഷ്കരിക്കാറുള്ളത്. അടിസ്ഥാന ശമ്പളത്തിന്റെ നിശ്ചിത ശതമാനമായാണ് ജീവനക്കാർക്ക് ഡി.എ. നൽകിവരുന്നത്. കഴിഞ്ഞ ഏപ്രിലിൽ രണ്ട് ശതമാനം ഡി.എ. വർധിപ്പിച്ചതിനെത്തുടർന്ന് നിരക്ക് അടിസ്ഥാന ശമ്പളത്തിന്റെ 60 ശതമാനത്തിൽ എത്തിയിരുന്നു. ഇതിന്റെ തുടർച്ചയായാണ് ഇപ്പോൾ വീണ്ടും ഡി.എ. വർധിപ്പിച്ചു കൊണ്ടുള്ള പുതിയ പ്രഖ്യാപനം വന്നിരിക്കുന്നത്.
