ഇന്ത്യയുടെ റെയില്‍വേ ചരിത്രത്തില്‍ പുതിയ ചരിത്രമെഴുതാൻ രാജ്യത്തിന്റെ സ്വന്തം ബുള്ളറ്റ് ട്രെയിന്‍ ട്രാക്കിലേക്ക്. തദ്ദേശീയമായി രൂപകല്‍പ്പന ചെയ്ത ആദ്യ അതിവേഗ ട്രെയിനിന്റെ നിര്‍മാണം ബെംഗളൂരുവിലെ ഭാരത് എര്‍ത്ത് മൂവേഴ്സ് ലിമിറ്റഡിന്റെ (BEML) പ്ലാന്റില്‍ അതിവേഗം പുരോഗമിക്കുകയാണ്. മുംബൈ-അഹമ്മദാബാദ് ഹൈസ്പീഡ് റെയില്‍ ഇടനാഴിയിലാകും ഈ അഭിമാന പദ്ധതി യാഥാർത്ഥ്യമാകുന്നത്.
പ്രധാന സവിശേഷതകള്‍ ഒറ്റനോട്ടത്തില്‍:
- വേഗതയും കരുത്തും: പരീക്ഷണ ഓട്ടത്തില്‍ മണിക്കൂറില്‍ 280 കിലോമീറ്റര്‍ വരെ വേഗത കൈവരിക്കാന്‍ ശേഷിയുള്ളതാണ് ഈ ട്രെയിന്‍. യാത്രക്കാരുമായി സർവീസ് നടത്തുമ്പോൾ പരമാവധി വേഗത മണിക്കൂറില്‍ 249 കിലോമീറ്റര്‍ ആയിരിക്കും.
- രൂപകല്‍പ്പനയും ശേഷിയും: ഏകദേശം 202 മീറ്റര്‍ നീളമുള്ള ട്രെയിനില്‍ ആകെ 8 കോച്ചുകളാണുള്ളത് (4 മോട്ടോര്‍ കാറുകളും 4 ട്രെയിലര്‍ കാറുകളും). ഒരു സമയം 557 യാത്രക്കാര്‍ക്ക് ഇതില്‍ യാത്ര ചെയ്യാം.
- സീറ്റിംഗ് ക്രമീകരണം: 7 സ്റ്റാന്‍ഡേര്‍ഡ് ക്ലാസ് കോച്ചുകളും (3×2 സീറ്റിങ്) 1 എക്‌സിക്യൂട്ടീവ് ക്ലാസ് കോച്ചുമാണ് (2×2 സീറ്റിങ്) ഉണ്ടാകുക. ഭിന്നശേഷിക്കാര്‍ക്കായി രണ്ട് പ്രത്യേക ഇടങ്ങളും സജ്ജീകരിച്ചിട്ടുണ്ട്.
- ആധുനിക സാങ്കേതികവിദ്യ: ട്രെയിനിന്റെ ഇരുവശങ്ങളിലും ഡ്രൈവര്‍ ക്യാബിനുകളും ഇന്റലിജന്റ് ഓണ്‍ബോര്‍ഡ് കണ്‍ട്രോള്‍ സംവിധാനവുമുണ്ട്. തിരക്കേറിയ സമയങ്ങളില്‍ രണ്ട് ട്രെയിനുകൾ ഒന്നിപ്പിച്ച് 16 കോച്ചുകളാക്കി മാറ്റാനും സാധിക്കും.
- യാത്രാസൗകര്യങ്ങള്‍: മികച്ച ലെഗ് സ്‌പേസ് ഉള്ള സീറ്റുകള്‍, വിശാലമായ ജനാലകള്‍, എല്‍ഇഡി ലൈറ്റുകള്‍, ലഗേജ് റാക്കുകള്‍, വൈഫൈ കണക്റ്റിവിറ്റി തുടങ്ങിയ ആധുനിക സൗകര്യങ്ങളെല്ലാം യാത്രക്കാർക്കായി ഒരുക്കുന്നുണ്ട്.
സുരക്ഷയ്ക്കും യാത്രാസൗകര്യത്തിനും ഒരുപോലെ പ്രാധാന്യം നല്‍കിക്കൊണ്ട് ഇന്ത്യന്‍ എന്‍ജിനീയറിങ് മികവില്‍ ഒരുങ്ങുന്ന ഈ ബുള്ളറ്റ് ട്രെയിന്‍ രാജ്യത്തിന്റെ ഗതാഗത മേഖലയില്‍ പുതിയൊരു വിപ്ലവത്തിന് തുടക്കം കുറിക്കുമെന്നാണ് പ്രതീക്ഷിക്കുന്നത്.
