പുതിയ രീതി 2028 മുതൽ
സിബിഎസ്ഇ പത്താം ക്ലാസ് ബോർഡ് പരീക്ഷകളിൽ വിദ്യാർഥികൾക്ക് ആശ്വാസമേകുന്ന പുതിയ പരീക്ഷാ പരിഷ്കാരങ്ങൾ പ്രഖ്യാപിച്ചു. പ്രധാന വിഷയങ്ങളിൽ പരാജയപ്പെടുന്നവർക്ക് സ്കിൽ (നൈപുണ്യ) വിഷയത്തിലെ മാർക്ക് ഉപയോഗിച്ച് പരീക്ഷ വിജയിക്കാനുള്ള അവസരമാണ് പുതിയ മാറ്റത്തിലൂടെ ലഭിക്കുന്നത്. 2028-ൽ പത്താം ക്ലാസ് ബോർഡ് പരീക്ഷ എഴുതുന്ന വിദ്യാർഥികൾക്കായിരിക്കും ഈ ആനുകൂല്യം ലഭിക്കുക.
പുതിയ പരീക്ഷാ രീതി എങ്ങനെ?
പുതിയ നിയമപ്രകാരം വിദ്യാർഥികൾ അഞ്ച് നിർബന്ധിത വിഷയങ്ങൾക്കൊപ്പം ഒരു ഓപ്ഷണൽ സ്കിൽ പേപ്പർ കൂടി പഠിക്കേണ്ടതുണ്ട്. രണ്ട് ഭാഷാ വിഷയങ്ങൾ, മാത്തമാറ്റിക്സ്, സയൻസ്, സോഷ്യൽ സയൻസ് എന്നിവയാണ് പ്രധാന വിഷയങ്ങൾ. ഇതിൽ മാത്തമാറ്റിക്സ്, സയൻസ്, സോഷ്യൽ സയൻസ് എന്നിവയിൽ ഏതെങ്കിലും ഒന്നിൽ പരാജയപ്പെട്ടാൽ, സ്കിൽ വിഷയത്തിൽ ലഭിച്ച മാർക്ക് പകരം ചേർത്ത് വിജയം ഉറപ്പാക്കാൻ വിദ്യാർഥികൾക്ക് സാധിക്കും.
22 സ്കിൽ വിഷയങ്ങൾ; NSQF സർട്ടിഫിക്കറ്റും ലഭിക്കും
‘കൗശൽ വികാസ്’ പദ്ധതിയുടെ ഭാഗമായി അല്ലെങ്കിൽ സി.ബി.എസ്.ഇ അംഗീകരിച്ച 22 സ്കിൽ വിഷയങ്ങളിൽ നിന്ന് ഇഷ്ടമുള്ള ഒന്ന് വിദ്യാർഥികൾക്ക് തിരഞ്ഞെടുക്കാം. ആർട്ടിഫിഷ്യൽ ഇന്റലിജൻസ്, ഡാറ്റാ സയൻസ്, ഇൻഫർമേഷൻ ടെക്നോളജി, ഹെൽത്ത് കെയർ, ഫിനാൻഷ്യൽ മാർക്കറ്റ് തുടങ്ങിയവയാണ് പ്രധാന ഓപ്ഷണൽ വിഷയങ്ങൾ. ഈ സ്കിൽ പേപ്പർ വിജയിക്കുന്നവർക്ക് നാഷണൽ സ്കിൽസ് ക്വാളിഫിക്കേഷൻസ് ഫ്രെയിംവർക്ക് (NSQF) സർട്ടിഫിക്കറ്റും നൽകും.
പാഠ്യപദ്ധതിയിലെ മറ്റു മാറ്റങ്ങൾ
- 2026-27 (ഒമ്പതാം ക്ലാസ്): ഈ അധ്യയന വർഷത്തിൽ ഒമ്പതാം ക്ലാസിലെത്തുന്ന കുട്ടികൾക്ക് ‘ഇൻഡിവിജ്വൽസ് ഇൻ സൊസൈറ്റി’, സി.ടി & എ.ഐ മൊഡ്യൂളുകൾ എന്നിവ പാഠ്യപദ്ധതിയിൽ ഉണ്ടായിരിക്കില്ല.
- 2027-28 (പത്താം ക്ലാസ്): ഈ ബാച്ചിലെ വിദ്യാർഥികൾക്ക് എൻവയോൺമെന്റൽ എഡ്യൂക്കേഷൻ വിഷയം ഒഴിവാക്കിയിട്ടുണ്ട്.
മാറ്റം ആർക്കൊക്കെ ബാധകം?
2026-27 അധ്യയന വർഷത്തിൽ ഒമ്പതാം ക്ലാസിൽ പ്രവേശിക്കുകയും 2028-ൽ പത്താം ക്ലാസ് പരീക്ഷ എഴുതുകയും ചെയ്യുന്ന വിദ്യാർഥികൾക്കാണ് ഈ പരിഷ്കാരങ്ങൾ ബാധകമാകുന്നത്. എന്നാൽ നിലവിൽ പഠിക്കുന്ന പത്താം ക്ലാസ് ബാച്ചിന് പഴയ രീതി തന്നെ തുടരുമെന്നും ഈ മാറ്റങ്ങൾ ബാധകമല്ലെന്നും സി.ബി.എസ്.ഇ അക്കാദമിക് ഡയറക്ടർ പ്രഗ്യ എം. സിങ് വ്യക്തമാക്കി.
